Hamiləlik dövrü üzmək çox xeyirlidir. Üzmə zamanı qol, ayaq və qarın nahiyəsində olan bütün əzələlər işlədiyi üçün, anada ürək vurğusu və alınan oksigenin miqdarı artır. Bunun sayəsində uşağa gedən oksigenin miqdarında da artma olur. Hamiləliyin ilk üç ayında üzmək ürəkbulanma və qusmanı da azalda bilər. 

Digər aylarda da bağ və vətərləri möhkəmləndirərək, bel və kürək ağrılarını azaldır. İlk üç aylıqda həftədə 2-3 dəfə və gün ərzində 20 dəqiqə üzmək kifayətdir. Sonra isə müddəti 30 dəqiqəyə qədər artırmaq olar. Yayın isti aylarında hamilə qadınları maraqlandıran ən aktual sual - "Hamilə qadınlar çimərliyə gedə bilərmi?" - sualıdır. Bu suala cavabımız "bəli"dir. Hamilə qadınlara dənizdə üzmək ziyan deyil. Hətta dəniz üzgüçülük hovuzlarına nisbətən daha təmiz hesab olunur. Ancaq hamilələr getdikləri çimərliyin təmiz olmasına mütləq fikir verməlidir. 

Çimərlik və su çirklidirsə, dənizdə çimmək məsləhət görülmür. Hamiləlik müddətində ayaqlarda qıcolma artdığından,hamilə qadınlar dayaz yerdə (suyun səviyyəsi sinəyə qədər olması şərti ilə) yaxın məsafələrdə üzməlidirlər və suya tək girməməlidirlər. Həmçinin üzərkən nəfəsi uzun müddət saxlamaq olmaz. Hamilə qadınlar çimərlikdə hamilələr üçün xüsusi hazırlanmış çimərlik geyimindən istifadə edə bilərlər. Hamiləlik müddətində qaralma, ultrabənövşəyi şüaların təsirindən fol turşusu çatışmazlığına gətirə bilər. Buna görə də hamiləlik müddətində qaralmağa çalışmaq risklidir. Dənizə günün isti saatlarında girmək olmaz. Dənizə girmək üçün ən yaxşı vaxt - səhər saatları və ya axşamüstü günəş şüalarının azaldığı vaxtdır. 

Əlbəttə, bütün bu deyilənlər normal hamiləlik keçirən qadınlara aiddir. Hamiləlik vaxtı düşük təhlükəsi, qanın, suyun gəlməsi və s. problemlər varsa, üzmək təhlükəlidir. Hamilə qadınlara səyahətə çıxmaq və çimərliyə getməyi planlaşdırarkən öz həkimləri ilə məsləhətləşmək tövsiyə olunur.

Nərmin Həsənli

Mama-ginekoloq